पंतप्रधानांच्या आवाहनाला सर्वांनी साथ द्यावी - चंद्रकांतदादा पाटील
Apr 3, 2020, 11:11 IST
५ एप्रिल रोजी कोरोनाविरुद्धच्या लढ्यात आपली एकजूट पुन्हा दाखवावी
पंतप्रधानांच्या आवाहनानुसार ५ एप्रिल रोजी सर्वांनी कोरोनाविरुद्धच्या लढ्यात आपली एकजूट दाखवावी , आणि रात्री ९ वाजता आपल्या घरातील लाईट नऊ मिनिटांसाठी बंद ठेवावेत ; आणि दिव्याच्या प्रकाशात भारतमातेचे स्मरण करावे , असे आवाहन भारतीय जनता पक्षाचे प्रदेशाध्यक्ष . आ. चंद्रकांतदादा पाटील यांनी केले.
पाटील म्हणाले की , देशात लॉकडाऊन जाहीर झाल्यानंतर अनेकांमध्ये एकटेपणाची , नैराश्येची भावना निर्माण झाली. या अंधकारमय वातावरणातून सर्वांना बाहेर काढून , त्यांना प्रकाशाचा मार्ग दाखवण्यासाठी दि. ५ एप्रिल रोजी रात्री ९ वाजता सर्वांनी आपापल्या घरातील लाईट नऊ मिनिटांसाठी बंद करावेत , आणि मेणबत्ती , मोबाईलचा फ्लॅश लाईट , टॉर्चच्या प्रकाशात घराच्या बाल्कनीत , मोकळ्या परिसरात येऊन भारतमातेचे स्मरण करावे. यावेळी कुणीही रस्त्यावर येऊन गर्दी करु नये. सोशल डिस्टन्सिंग कटाक्षाने पाळावे.
ते पुढे म्हणाले की , कोरोनाविरुद्धच्या लढ्यात संपूर्ण देशाने एकजुटीचा प्रत्यय जगाला दाखवून दिलेला आहे. ही एकजूट अशीच कायम ठेवल्यास आपण कोरोनावर नक्कीच मात करु , असा विश्वास ही पाटील यांनी यावेळी व्यक्त केला.