बंगळूर - कॉंग्रेसचे कर्नाटक विधानसभेतील विरोधी पक्षनेते सिद्धरामैय्या यांनी आज (शुक्रवार) पदाचा राजीनामा देण्याचा निर्णय जाहीर केला. पक्षनेतृत्त्वाला माझ्या नेतृत्त्वाविषयी आत्मविश्‍वास वाटत नसल्याने आपण हा राजीनामा देत असल्याचे त्यांनी पत्रकारांना सांगितले.

पक्ष नेतृत्त्वाला माझ्या नेतेपदाविषयी शंका आहे. त्यांना माझ्याविषयी आत्मविश्‍वास वाटत नाही. त्यामुळेच विधान परिषदेच्या निवडणुकीसाठी मी सुचविलेल्या नावाकडे दुर्लक्ष केले जात आहे. ही बाब लक्षात घेऊनच मी पदाचा राजीनामा सादर केला आहे, असे ते पत्रकारांशी बोलताना म्हणाले.

सिद्धरामैय्या यांनी आपले समर्थक आणि माजी केंद्रीयमंत्री सी. एम. इब्राहिम यांचे नाव पक्षाला सूचविले होते. मात्र, पक्ष विरष्ठांनी हे नाव फेटाळून लावले. त्यामुळे ते नाराज झाले आहेत.

मी माझा राजीनामा कॉंग्रेसाध्यक्षा सोनिया गांधी आणि प्रदेशाध्यक्ष जी. परमेश्‍वर यांच्याकडे पाठविला आहे. तसेच, विधानसभेचे सभापती के. जी. बोपैय्या यांच्याकडे गुरुवारी राजीनामा सादर केला आहे, असे त्यांनी या वेळी सांगितले.

पक्षाच्या विरिष्ठांनी सुरवातीला इब्राहिम यांच्या नावाला मंजुरी दिली होती. मात्र, त्यानंतर मला कोणतीही पूर्वकल्पना न देता त्यांचे नाव काढून टाकण्यात आले, अशी नाराजी सिद्धरामैय्या यांनी व्यक्त केली.