औरंगाबाद- रायगड जिल्ह्यातील दिवेआगार येथील प्रसिद्ध गणेश मंदिरातील सुवर्णमूर्तीच्या चोरीप्रकरणी औरंगाबादमधील गंगापूर तालुक्यातून सात संशयितांना ताब्यात घेण्यात आले आहे.

दिवेआगार चोरीप्रकरणी जी रेखाचित्रे तयार केली गेली होती त्यात या सात संशयितांच्या चेह-यांशी जुळत असल्याने पोलिसांच्या विशेष शाखेने त्यांना ताब्यात घेतले आहे. गंगापूरमधील पाकोरा वस्तीत हे संशयित लपून बसले असल्याची पोलिसांना माहिती मिळाली होती. त्यानुसार पोलिसांनी ही कारवाई केली.

हे आहेत संशयित सात जण- पाकोरा वस्तीत शुक्रवारी पहाटे विशेष शाखेने केलेल्या ताब्यात घेतलेल्या संशयिताकडून कु-हाड, चाकू, मिरच्याची पूड आदी साहित्य जप्त केले आहे. आकाश काळे (२०), बाळू काळे (१९), शेरु पिंपळे (२९), राजू पिंपळे (२५), जिगर ऊर्फ विजय पिंपळे (२२), गणेश पिंपळे (१९), मोहन काळे (२१) अशी संशयित ताब्यात घेतलेल्यांची नावे आहेत.

दिवेआगार येथून गेल्या महिन्यात सुवर्ण गणेशमूर्तीची चोरी करण्यात आली होती. तसेच दरोडेखोरांकडून तेथील दोन सुरक्षारक्षकांची हत्या करण्यात आली होती. यानंतर हे प्रकरण संपूर्ण राज्यभर गाजले. चोरांचा शोध लागत नसल्याने सरकारवर निष्क्रीय असल्याचा ठपका ठेवत शिवसेनेने विधिमंडळात आरती केली होती. त्यामुळे शिवसेनेच्या १३ व भाजपच्या एका आमदाराचे निलंबन करण्यात आले होते. विशेष म्हणजे सरकारने या आमदारांचे शुक्रवारीच निलंबन मागे घेण्यात आले आहे.