सातारा दि.१२( प्रतिनिधी)- मला राखी बांधण्याकरिता बहिण पाहिजे, अशी प्रतिज्ञा शहरातील व जिल्ह्यातील हजारो विद्यार्थ्यांनी घेतली. सातारा जिल्हा परिषदेचे राष्ट्रीय ग्रामीण आरोग्य अभियान, इंडियन मेडिकल असो., आणि जिल्ह्यातील शाळा , महाविद्यालयांच्या संयुक्त विद्यमाने आज जिल्हापरिषदेच्या मैदानावर रक्षाबंधनाच्या निमित्ताने स्त्री भ्रुण हत्या रोखण्यासाठी आयोजित केलेल्या प्रतिज्ञा सोहळ्यात आज हजारो विद्यार्थी - विद्यार्थिनी नी शपथ घेतली. यावेळी विद्यार्थ्यांनी * माझ्या ज्या बहिणीचे गर्भजल निदान अथवा सोनोग्राफीद्वारे निदान करून हत्याकांड होत आहे. त्यांचे संरक्षण करणे हे माझे आद्य कर्तव्य असून मला ज्ञात असलेल्या सर्व मार्गांनी मी त्याला कडाडून विरोध करेन. यासाठी समाजातील सर्व घटक मग ते कोणीही असोत. अगदी माझे आप्तेष्ट असले तरी मी या प्रतिज्ञा द्वारे त्यांना यापासून परावृत्त करण्यासाठी सर्व प्रयत्न घटनेच्या अधीन राहून करेन. माझ्या बहिणीचे संरक्षण करणे हे माझे कर्तव्यच असून जन्माला येणे, सन्मानाने जगणे हा तिचा हक्कच आहे. याची मी पुरेपूर जाणीव ठेवीन. आज रक्षाबंधनाच्या दिवशी या प्रतिज्ञा द्वारे मी तिच्या सुरक्षेचे हे बंधन आनंदाने आणि आदरपूर्वक स्वेच्छेने स्वीकारीत आहे.* अशी प्रतिज्ञा या वेळी घेतली. यावेळी जिल्हापरिषदेच्या अध्यक्षा ज्योती जाधव, उपाध्यक्ष चंद्रकांत जाधव, जि. प मुख्य कार्यकारी श्याम देशपांडे, पोलीस अधीक्षक के.एम. एम. प्रसन्ना, अतिरिक्त जिल्हाधिकारी बी.एस.पऱ्हाड, उपजिल्हाधिकारी सोनाप्पा यमगर, जिल्हा शल्य चिकित्सक सुरेश जगदाळे, जिल्हा आरोग्य अधिकारी भगवानराव पवार, शिक्षण अधिकारी मकरंद गोंधळी व जिल्हा परिषदेचे पदाधिकारी व सदस्य यावेळी उपस्थित होते.